تجاربي مع الكيراتين كل الأنواع الي جربتها ، وين ، وبكم

اسعد الله أوقاتكم ..

جايه احكيلكم عن انواع الكيراتين الي قد سويتها 

ماشوف يحتاج اكتب وش هو الكيراتين وش يسوي لان خلاص الكل عارف ولو منتي عارفه بتلاقي مواضيع كثيره في قوقل عنه ف بخش ع المهم ع طول p: بس الي بقوله ان فيه نوعين كيراتين شي معالج فقط يخفف النفشة ويعالج الأطراف ويحسن مظهر الشعر بدون مايغير طبيعته.. ونوع ثاني يسوي جميع ماسبق بالاضافة لانه يفرد الشعر.

زيرو :

من اول ماطاحو الناس فيه تقريبا من سنتين سوته خالتي ومره ماشاء الله عجبني وقررت انو خلاص بروح اسويه .. رحت نفس الصالون الي سوت عنده للاسف ماتذكر اسمه أتذكره صالون عادي صغير ومو شي .. المادة الي حطتها لي اياه اسمها "زيرو"

علبتها لونها اسود ،،ماتذكر شكلها مضبوط بس اتذكر لونها

طريقته: برضو ماتذكر بالتفصيل بما انه قبل سنتين يعني! ><" لكن حطته ع شعري وبعدين استشورت وسوت بـ الليس واخر شي غسلته الخلاصه انه ينغسل في نفس اليوم .. 

مررررره مرررره حبيته كان شعري جميل ماتغيرت طبيعته الكيرلي لكن سار مره احلى ❤️

ماحسيته انعدم بالعكس كانت أطرافه معدومة وطلبت منها تقصها اول وقالتلي لا مايحتاج بعد المعالجة قرري ،، وفعلا بعدها لقيت الأطراف مره احسن ماتحتاج قص .. 

زي ماقلت نفس طبيعته الكيرلي ماتغيرت بس اختفت النفشة وكان صحي حيوي جميييل .. 

استمر معي ٤ شهور في البداية كان خيالي ملمسه ومظهره بعدها بدا يخف وبعد ٤ شهور كنت حاسه انو خلاص راح وهذا شعري الطبيعي لين نزلت المسبح *-* 

طلعت من المسبح رجعت نفشة شعري ورجع شعري القديم "تخيلو صدمتي في نفسي كيف كانت عنيفه هههههه  "

طبعا الشعر المعالج يتطلب عناية خاصه>> شامبو وبلسم خاص بالكيراتين وانو نبعد عن الكلور وممكن نستخدم اي شامبو خال من كلوريد الصوديوم ..

المهم اول مره سويت كيراتين الزيرو كان طول شعري 

١٢ إنش ^^ 

وسعره ب١٥٠٠ طبعا يختلف من صالون لآخر لكن عشان يعني يكون عندكم فكره عن سعره.. 

امازون: 

المره الثانية الي سويت فيها كيرايتن السنة الي بعدها (رمضان العام) رحت مع كم وحده لصالون اسمه الكعكي في جده حي الروضة،،

الصالون هذا يسوو كيرايتن امازون لأي طول شعر ب١٠٠٠ ريال بس ! 

يعني مره حلو لصحبات الشعور الطويلة ، عاملاتهم كويسين وفاهمين شغلهم وترى اخر زيارة لي قبل سنة ف معرف اذا تغيرو *-*

"مو دعاية للصالون طبعا" 

بالنسبة لكيراتين امازون كان حرفيا فرد!! شعري سار فجاءه شعر ساااايح زي الهنود وشي شي 

بس عيبه ريحته مرررررره قوية لدرجة انو الصالون يوقعونك تعهد ان لو عندك اي أمراض رئوية انتي تتحملين كامل المسؤولية ! ثاني عيب من عيوبه انه ينحط في الصالون ويستشورو شعرك ويسوونه بالليس وبعدها تقعدين يومين ماتتروشين ولا يجي شعرك مويا ><* 

وطبعا خلال هذي اليومين ممنوع تربطين شعرك باي شكل من الأشكال ! 

بعد اليومين ترجعين للصالون يغسلونه لك وينشفونه بالاستشوار ونعيما ^^ 

قعد شعري سايح تقريبا شهر بس بعدين طفشت مره ههههه هو صح حلو تصحين من النوم شعرك مستشور بس خلاص اشتقت للكيرلز حقتي .. 

ايوا صح بعلمك طريقه مع اي نوع كيراتين لما تكونين معالجة شعرك الشعر راح يثبت ع الحالة الي نشف عليها يعني حاولي ماتربطيه وهو مبلول وجففيه بالاستشوار من فوق لتحت وبمساعدة أصابعك ؛ اتحداكم تفهمون هههههههه لا من جد يعني كانك تمشطي شعرك باصباعك والهواء من فوق لتحت حتى لو بارد كانك بتستشورين عادي (لا تسوين فيديوكليب p: ) ولو عندك الاستشوار الفرشة افضل وأسهل .

البوتوكس

هو معروف انه الأفضل لان ماله ريحة قويه ونتائجه حلوه بس اول مره جيت اسويه قالتلي الي في الصالون لاااا انتي شعرك مايبغاله هو حق الشعر الخشن مرا ! طبعا معلومتها غلط مهو مره قوي عادي جداً زي الي قبله ! الحلو فيه ريحته جميلة . 

طريقته : تغسلي شعرك وتحطي ماسك بعد يمكن نص ساعه او ساعه الا ربع تبللي شعرك شوي وتبدأ تسويلك ليس وبعد الليس بمعرف كم بالضبط يمكن ساعة كمان تغسليه وخلاص .

الي سوتلي هو كوفيرا اثيوبيه تجي للبيت ع فكرة هي شاطرة مره ودايمن نجيبها تسوي لنا تسريحات في الزواجات وصبغات وأي شي يخص الشعر "حقتنا خخخ" 

المهم هو أسعاره تبدأ من ٢٠٠٠ وفوق بس الي فهمته منها انها قاطه فلوس مع كم وحده واشتروه وتقاسموه ف سعرها مره رخيص انا سوت لي ب١٥٠٠ ع ما أظن وطول شعري تقريبا ١٦ إنش 

ف يعني مره حلو! ثاني يوم رحت لصالون عشان اقص شعري والي هناك طبعا عرفت انو مسويه كيراتين وسالتني فين وبكم وماصدقت انو اصلي الين شمت ريحته هع 

المهم الحرمة الي جبتها اسمها ليلى رقمها: 

0508707525

هي مابتروح لأي احد ف قولولها من طرف سوزان وان شاء الله تبيض الوجه هههههه

انا لي شهر مسويته وفي البداية كان مره ساييييييح بس الحمدلله بدا يفك ..

هذي المرة سويته عشان أعالج الأطراف بس احب اقولكم انها ما اتعالجت إطلاقا ورحت ثاني يوم قصيته 

ما اقول ما استفدت شي بس ماكانت النتيجة الي ابغاها .

...................

في الاخير أبغى اقول ملاحظتي: 

المره الاولى كان في تساقط يعور القلب "( لدرجة شعري بينزل خصل + قشرة فظييييعه

بس معرف اذا من نوع الكيراتين الي استخدمته او لا ؛ لان وقتها صديقتي كانت مسويه امازون ونفس الشي بالضبط كان معاها .

المره الثانية حرصت اني ماحط البلسم ع الجذور (انا شعري جاف ويحتاج البلسم من الجذور للأطراف مو زي الشعور العادية او الدهنية) المهم لما احترمت نفسي وحطيت بس ع الأطراف ماكان في قشرة وبالنسبة للتساقط كمان كان طبيعي مو زي المرة الاولى .

المرة الثالثة نفس الشي معد احط بلسم ع الجذور بس شعري ساير دهني بشكل! 

ايه صح ترى الي شعورهم ناعمة او دهنية بتكرهون حياتكم لا سويتو كيراتين بيسير دهني اكثر لدرجة انك تحتاجي تتروشي اكثر من مره في اليوم مهما الصالون قالك عادي ومدري ايش لا تصدقيهم وما انصحك بصراحة تسويه .. 

المهم نكمل مافي تساقط كثير وقشرة بس اول يومين بشكل خفيف وراحت..

نصائح اخيرة / 

مع الكيراتين خذي الشامبو والبلسم من الصالون لانه ماينفع له اي شامبو زي ماقلت فوق 

اذا تروشتي اغسلي شعرك كانك بتغسليه من صبغة بدون ماتعجنين الشعر

الشامبو الي يستخدم للكيراتين مايطلع رغوة ومايجفف الشعر وطبيعي مايحتاج تكثرين منه او كذا 

وطبعا لا تسبحين في مسبح فيه كلور

لا تستخدمين زيوت 

لا تصبغين قبل الكيراتين بأسبوع ولا بعده بأسبوع 

وتراه كمان يفتح لون الشعر المصبوغ  

بالنسبة للشامبو والبلسم عادة تكون بحدود ٣٠٠ كذا وتاخذوها من نفس الصالون الي سويتو عنده 

في فجدة صيدلية المختار في شارع الامير سلطان عندهم شامبو وبلسم بحدود ٣٠ ريال تنفع للشعر المعالج بالكيراتين بس ماحبيت ريحتها بنزل صورتها في الانستقرام في وقت لاحق 

اخر شي : راح ارجع اسويه؟ 

لا خلاص وش هو فته! هههههههه

بس لو بسويه بختار ارجع اسوي الاول مدري حبيته لانه ماغير طبيعة شعري بغض النظر عن باقي العيوب احس المره الثانية يمكن ما يأثر زي الاولى << من راسي ترى .. 

المهم البوست لي اكثر من أسبوعين اكتب فيه واحفظه وبعدين أكمل وارجع احفظه لين اخر شي اليوم خلااااص لازم أكمله و انزله ف كتبته الحين وانا في السوق ^^'