لحواجب مثاليه HOW TO PERFECT EYEBROWS

كنت ناوية اخر البوست لين انسق المدونة وارتبها بس بصراحة

مع بداية الدراسة تلخبط وضعي ومدري متى بفضى  "ادعوولي ><"

اول بوست تعمدت اخليه عن الحواجب

الحواجب جججججدا مهمة عندي مو بس لانها اطار الوجه

بس لاني احسها الشي الوحيد الي اقدر اغيره في ملامحي ولعبت فيها كثير

وعرفت ايش يحليني وايش يخربني وايش يكبر شكلي وايش الي ينعم ملامحي

و قبل ما ابدا احط مكياج من وانا طالبه بالثنوي كان دايمن في جيب مريولي

قلم الحواجب واسوي لصديقاتي ههههههه

المهم نبداء

حتكلم عن طريقتي 

اول حاجه حواجبي من النوع الخفبف فتعودت اصبغها بصبغة حواجب 

سعرها ب17 ريال تلاقوها بالصيدليات الكبيرة 

الدرجة بني فاتح بس تعتبر البني العادي مدري يمكن عشاني اخليها تطول " 10 دقايق تقريبا " 

الصبغة جيدة وتبقى تقريبا اسبوعين او اكثر ع الشعر 

اما لو منطقة مافيها شعر بالكثير يومين وتروح ..

المهم بكذا انا اسير ما احتاج الا بودرة ارتب بيها حواجبي 

ونصيحة لو حواجبك ماشاء الله كثير لاتستخدمي الا البودرة عشان تعطيها منظر طبيعي 

البودرة الي استخدمها نسيت اصورها ><" 

بس مصورتها كثير في الانستقرام 

سعرها ب70 اريال من كوستال سنس وهي اربعة الوان وتجي معاها فرشة جيدة !

شخصيا احب اشقر نهاية حاجبي عشان اعرف اسوي الرسمة الي ابغاها 

فنجي للجد هنا ؛) 

اول حاجة استخدم تاتو الحواجب من فورايفر سعره ب202 ريال 

في البداية اشتريت بني غامق و بصراحة ماحبيته كثير حسيته 

خسارة فلوس بس رجعت اشتريت الفاتح لاني كنت صابغة شعري ومالقيت في ماركة ثانية اللون الي ابغاه , هذي سواتش للونين الي عندي 

الغامق رقمه 30 والفاتح 20 ,, كنت ابغى 15 بس مالقيته ’( 

بالنسبة لثباته جيد الى حد ما 

يعني اول ايام استخدمته وانا ماعندي صلاه فكان غسيل الوجه بشويش وانا خايفة ينمسح 

قعد معايا وقتها 3 ايام بس بعدين مع الوضوء سار بالكثير يوم 

وشي جيد طبعا مقارنة بجل لاينر ماك الي بس تجي المويا يختفي !!

الشي الثاني الجل لاينر من ماك 

هذي الدرجة الوحيدة سعره ب95 قبل رفع الاسعار 

زي ماقولت عن ثباته اول ماتجي مويا يسيح بس عجبتني درجته بالضبط زي ما ابغاها 

هذي سواتش للون 

نجي لطريقتي الحين من عند نهاية الحاجب وشوي من البداية احددها بتاتو فور ايفر الفاتح 

" الغامق ما استخدمه اعطيته اختي خخخ" 

كذا مثال :

و بعد كذا بفرشة أي لاينر نحيفه زي هذي 

مع جل لاينر ماك ابدأ ارسم شعرات صغيرة متفرقة كذا 

وبكذا يعطيني الممنظر الطبيعي الي ابغاه بدال مايبان خط كحل او كذا يبان كانو شعر طبيعي 

اخر حاجة لو كان التاتو متكتل ع الحواجب زي مثلا في الصورة بداية الحاجب !!

هنا استخدم هذي الفرشة من ريل تكنيك 

بجهة الحديد >< معرف كم سعرها جاتني هديه من التاجرة روز ذابالم ,,

المهم بتشيل كل الزوايد افضل من الفرشة الي جات مع التاتو 

كذا خلصت طريقتي نجي للناس الي يحبو يستخدمو الاقلام للحواجب

اقلام ماركة نيكس جميله وسعرها 18 ريال  بس 

عندي منها هذي اللونين 

وهذي سواتشات 

و لو انتي حواجبك من النوع الي مو مرتب ممكن تستخدمي جل الحواجب الي يجي زي المسكرا 

يرتبها ويثبتها زي هذا 

برضو ماعرف سعره بس جممميييييل جدا من لودي شوب ربي يسعدها $: 

موجود بماركات كثير + لو حابه تفتحي حواجبك ممكن تخلطي معاه أي شادو فاتح باللون الي تبغيه 

نصائح ثانية :

* دايمن بعد ماتخلصي حواجبك حدديها بكونسيلر يعطيها منظر نظيف وكنك خارجه من صالون 

* تحت الحاجب للايام العادية اعتمدي اضاءة ورديه مطفيه تعطي ايفكت جميل

*حاولي ماتعرضي حواجبك كثير ولاتنحفيها كثير 

*ابعدي عن الاسود في الحواجب يقسي الملامح ويكبر عمرك 

وقد تكلمت في الانستقرام عن كيف تشقري حواجبك بالبيت ماحبيت اعيد هنا حتى مايكون مكرر 

 امممم اعتقد بس كذا ان شاء الله ما اكون نسيت شي 

واعذروني ع التصوير لانو بالجوال ولسى ما حملت الفوتشوب عشان اعدلو -_-"

يارب تكونو استفدتو حتى لو شي بسيط ,,

وشكرا لكم كلكم ع كلماتكم التشجيعيه وكومنتاتكم الحلوة وع كل ثانيه اخذتها من وقتكم بجد شكرا